ԱՇԽԱՏԱՆՔ ՓՆՏՐՈՂԻՆ

<<Գործ բոլորին>> աշխատանքի տեղավորման գործակալությունը կարող է օգնել Ձեզ եթե դուք՝

-նորավարտ եք, փնտրում եք աշխատանք, բայց չգիտեք որտեղից սկսել,

-չեք կողմնորոշվում հայաստանյան աշխատաշուկայում և ունեք խորհրդատվության կարիք,

-աշխատում եք, սակայն փնտրում եք ավելի հարմար (գրաֆիկով, աշխատավարձով և այլն) պայմաններով աշխատանք կամ ակնկալում եք մասնագիտական աճ,

-ծանրաբեռնված եք և չեք հասցնում ինքներդ աշխատանք փնտրել (ուսումնասիրել աշխատանքի հայտարարության կայքերում տեղադրված թափուր հաստիքները, գտնել առավել վստահելի կազմակերպությունները և այլն):

Ինչպես ենք մենք աշխատում

Աշխատանք փնտրողը հրավիրվում է գրասենյակ մեր փորձառու մենեջերների հետ նախնական հարցազրույցի: Թեկնածուն անցնում է մանրակրկիտ մասնագիտական և հոգեբանական թեստավորում, անհրաժեշտության դեպքում իրականացվում է օտար լեզուների ստուգում: Այնուհետև կատարվում է թեկնածուի հնարավորությունների և ակնկալիքների հստակ գնահատում (Հաճախ թեկնածուները սխալ են գնահատում իրենց հնարավորությունները: Նման դեպքերում աշխատաշուկայի պահանջարկին և առաջարկին, ինչպես նաև աշխատավարձերի ընդհանուր պատկերին քաջ ծանոթ մեր մենեջերները ուղորդում են աշխատանք փնտրողին և օգնում իրատեսորեն գնահատել վերջինիս հնարավորությունները աշխատաշուկայում, ինչը բնականաբար հեշտացնում է աշխատանք գտնելու գործընթացն ու հնարավորությունները): Աշխատանք փնտրողի և <<Գործ բոլորին>> գործակալության միջև կնքվում է պայմանագիր, որը ժամկետով չի սահմանափակվում: Մեր մենեջերները օգնում են նաև կազմել կամ շտկել աշխատանք փնտրողի CV-ն, ինչը շատ կարևոր է, քանզի այն թեկնածուի վերաբերյալ առաջին տպավորությունն է: Երբ CV-ն արդեն պատրաստ է, սկսվում է բուն գործընթացը, այն է՝ աշխատանք փնտրողին ներկայացվում են իր տվյալներին համապատասխան հաստիքները: Մեր մենեջերները իրականացնում են թեկնածուի նախնական ներկայացում: Գործատուի կողմից նախնական հավանություն ստացած թեկնածուների հետ կազմակերպվում է հարցազրույց: Աշխատանքի տեղավորվելուց հետո թեկնածուն գործակալությանը վճարում է իր մեկ ամսվա հաստիքային աշխատավարձի 50%, որից հետո պայմանագիրը լուծվում է:

Գրանցման պայմանները

-2000 դրամ

-անձնագիր /պատճե/

-3x4 չափսի լուսանկար

Հավաստիացնում ենք, որ յուրաքանչյուր հաճախորդի նկատմամբ ցուցաբերվում է անհատական մոտեցում և սրտացավ վերաբերմունք:

Գրագետ CV կազմելու կանոնները

CV

Աշխատանք փնտրելիս անհրաժեշտ է ցուցաբերել համալիր մոտեցում. յուրաքանչյուր բաղադրիչ պետք է լինի անթերի։ Աշխատանքի տեղավորման կարևորագույն պայմաններից մեկը գրագետ կազմված CV-ն է։

Ինչու՞ է գրագետ կազմված CV-ն այդքան կարևոր:

Մեր օրերում CV-ն մարքեթինգային գործիք է, որը ստեղծված է Ձեր ծառայությունները գործատուին ներկայացնելու և վաճառելու համար:
• CV-ն ինքնաներկայացման ձև է, երբ առանց Ձեր անմիջական ներկայության ձևավորվում է Ձեր մասին առաջին տպավորությունը:
• Աշխատանք փնտրողը հնարավորություն է ստանում հրավիրվել հարցազրույցի գրագետ կազմած CV-ի շնորհիվ:

CV-ում ամենահաճախ հանդիպող սխալները

1. Քերականական սխալներ և բացթողումներ

Կարծում ենք, լրացուցիչ մեկնաբանությունն ավելորդ է:

2. Աշխատանքային փորձի սխալ ժամանակագրությունը կամ դրա բացակայությունը

Հստակ չնշված ժամանակագրությունը՝

• խլում է Ձեր և կադրային մասնագետի ժամանակը, որը ծախսվում է ճշտումների վրա
• խոսում է Ձեր անփութության մասին
• խճճում է հնարավոր գործատուին

Օրինակ, եթե CV-ի մեջ նշված է (2003-2004թթ.) սա կարող է նշանակել, որ դուք աշխատել եք 2 ամիս (2003 թ. դեկտեմբերից մինչև 2004թ.-ի հունվար) կամ գրեթե 2 տարի: Ահա թե ինչու է կարևոր տարեթվից առաջ նշել ամիսը: Խոսքը վերաբերվում է և՛ կրթությանը, և՛ աշխատանքային փորձին:

3. Ոչ ճշգրիտ անձնական տվյալներ կամ դրանց բացակայությունը

Շատ կարևոր է հստակ գրել Ձեր անձնական տվյալները, այն է՝ տարիքը, ընտանեկան կարգավիճակը, բնակության վայրը և, իհարկե, կոնտակտային տվյալները: Օրինակ՝ եթե նշված չէ, թեկնածուի բնակության հասցեն, կադրային աշխատակիցը կարող է զանհագարել և հրավիրել հարցազրույցի: Միայն այդ պահին կպարզվի, որ թեկնածուի համար դա շատ հեռու է, կամ չկա տրանսպորտ և այլն:

4. Կառուցվածքային սխալներ կամ վերջինիս բացակայություն

• Արձակ շարադրված տեքստը հարմար չէ CV-ի համար: CV-ն մի դարձրեք շարադրություն:
• ԻՆՔՆԱԿԵՆՍԱԳՐՈՒԹՅՈՒՆԸ CV չէ, դա պատմություն է ձեր մասին, որը, մեր օրերում, նախնական ներկայացման համար ընդունված չէ:
• MS Excel կամ PDF ֆորմատով ուղարկված CV-ն անհարմար է ներմուծել ռեքրութինգային ծրագրեր, նախընտրելի է MS Word ֆորմատը:
• Օրիգինալից scan արված CV-ները խիստ հակակրանք են առաջացնում:
• Պետք չէ ուղարկել տարբեր կազմակերպություններ լրացված CV-ի ձևեր:

Ռեքրութերները սովորաբար CV-ն կարդում են ուղղահայաց, այսինքն փորձառու աչքով որսում են իրենց անհրաժեշտ տվյալները և բանալի բառերը: Այդ պատճառող CV-ն պետք է լինի կառուցվածքային իմաստով հեշտ ընկալելի: Խորհուրդ ենք տալիս, որքան հնարավոր է տեղեկատվությունը շարադրել ըստ ժամանակագրության և տվյալները կենտրոնացնել այն փորձի և ձեռքբերումների վրա, որոնք վերաբերվում են այն աշխատանքին, որը փնտրում եք տվյալ պահին: Յուրաքանչյուր բաժին պետք է առանձնացնել: Դա կարելի է անել աղյուսակի ձևով կամ յուրաքանչյուր նոր բաժին նոր տողից սկսելով: Յուրաքանչյուր նոր բաժնի վերնագիր խորհուրդ է տրվում գրել մեծ և մուգ տառերով: Մի՛ ծանրաբեռնեք CV-ն դիզայնի ավելորդ ատրիբուտներով:

5. Ավելորդ մանրամասնություններով CV

Ընդունված կարծիք կա, որ 2-3 էջից երկար CV-ն անթույլատրելի է: Ռեքրութերը ուղղակի ժամանակ չի ունենալու կարդալ ավելին: Հավատացեք, ղեկավարը, ում մոտ հետագայում հնարավոր է հայտնվի Ձեր CV-ն, ավելի քիչ ցանկություն է ունենալու կարդալ երկար CV-ն քան ռեքրութերը: Այդ պատճառով շեշտը դրեք այն կարողությունների և ձեռքբերումների վրա, որոնք անհրաժեշտ են կոնկրետ ԱՅԴ աշխատանքի համար: Հիշեք, հակիրճ լինելը արվեստ է, բայց ոչ ի վնաս տեղեկատվության:

6. Օտար լեզվով CV

Տարածված սխալ է տեղական ընկերություն օտար լեզվով CV ուղարկելը: Օտար լեզվով CV ուղարկելը չի խոսում Ձեր՝ տվյալ լեզվին լավ տիրապետելու մասին, քանի որ Ձեր փոխարեն այն կարող էր թարգմանել ցանկացած մեկը: Պետք չէ ձգտել թողնել խելացիի տպավորություն, շատ հաճախ դա հակառակ ազդեցություն է ունենում:

Եթե ուզում եք ցույց տալ օտար լեզուների լավ իմացությունը, նշե՛ք դա լեզուների իմացության սյունյակում:

Բացառություն են կազմում այն դեպքերը, երբ կազմակերպությունը միջազգային է, և պահանաջվում է ներկայացնել օտար լեզվով CV: